‘Johannes getuig oor Hom en roep uit: “Hý is die Een van wie ek gesê het, ‘Hy wat ná my kom, is my voor, omdat Hy die eerste was.’ ” Uit sy volheid het ons almal genade ontvang – ja, genade op genade.’ – Johannes 1:15-16
Hierdie vers is so betekenisvol omdat ons GOD persoonlik leer ken. Ons kan genade ervaar as gevolg van SY volheid, as gevolg van SY karakter. Dit is so duidelik dat genade deel is van God se karakter. Hoekom sê ek dit, mag jy vra?
Wel GOD is mos volmaak? Hierdie volmaaktheid bestaan uit liefde, en hierdie liefde het die begeerte gehad om aan ons genade te bewys en GOD het toe aan ons genade bewys. Ten spyte van ons sondige natuur het Hy steeds gekies om ons te vergewe en met liefde te behandel.
Dit is noodsaaklik om te weet ons is na GOD se beeld geskape; daarom besit ons ook die karakter van genade; dit is ook deel van ons storie. Ons sal ook in situasies beland waar ons genade moet betoon. Ons moet ander liefhê en nie anders behandel as gevolg van hul agtergrond of foute nie.
Bied die gawe van genade aan iemand en jy sal sien hoe lewens verander en getransformeer word. Hoekom? Omdat ons probeer om die beste weergawes van onsself te word en daardie weergawe is die weergawe waarin ons in SY beeld geskep is. Ons is Sy beelddraers. Dra dus daardie beeld van genade saam met jou. Elke liewe dag.
Genade Draer
Gebed: Hemelse Vader, dankie dat U elke dag genade aan my bewys. Sal U my asseblief help om die beste weergawe van myself te word deur te besef ek is na U beeld geskape? Maak my elke dag bewus daarvan. Sal U asseblief die potensiaal van genade binne my ontsluit? Ek is so baie lief vir U. In Jesus se naam, Amen.
Uitdaging: Stel die wekker 3 keer per dag; wanneer daardie alarm afgaan, herinner jouself aan hierdie woorde deur hulle HARDOP TE SÊ: “Ek is die beelddraer van genade,” en “Ek is deur GOD geliefd,” en “Ek is genoeg.”
