Heilige Gees

💭 Reflekteer
Het jy geweet dat God se Heilige Gees ook saam met ons reis? Hy is die Een wat die pad vir ons oop en gelyk maak. Hy help ons om te volhard in ons geloof en wanneer Hy jou lewe beheer dan word die vrug van die Gees (soos liefde, vreugde en vrede) al meer in jou lewe sigbaar. Hy is nie net jou Helper nie, maar wil ook jou beste Vriend wees. Jy kan met Hom gesels oor enige iets en as jy Hom vertrou sal Hy altyd vir jou die beste raad en antwoorde gee. 

📖 Galasiërs 3:14
”Dit wat Christus Jesus gedoen het, het tot gevolg dat ook die nie-Joodse nasies deel kry aan Abraham se seën. Dit beteken dat ons deur die geloof die Gees wat belowe is, ontvang.”

❔ Vrae

• Abraham se seën is volmaak in Jesus – is jy deel van die nie-Joodse nasies?
• Wie is die Gees wat belowe is deur Jesus? Hoe ontvang ons Hom? 
• Word stil en vra die Heilige Gees om een persoon in jou gedagtes op te bring vir wie jy hierdie boodskap kan stuur.

🙏 Praat met God
Here, baie baie dankie vir die belofte van die _________. Dankie dat U Heilige Gees my ____ en ________, want op my eie kan ek niks doen nie. Amen.

📢 Identiteit stelling
Sê dit hardop: “Ek het die Heilige Gees.”

🎨 Reaksie
Kry ‘n stuk papier, tydskrifte, ‘n skêr, en gom bymekaar. Bid en vra die Heilige Gees om jou te lei – Maak dan ‘n collage van jou drome en dit wat jy eendag wil bereik. As jy vrae het, vra dit ook aan Hom. Vra Hom ook hoe God jou wil gebruik om Sy Koninkryk op aarde te bou.

🤳Sosiale media
Voordat jy jou foon optel en scroll vandag, vra die Heilige Gees om jou te lei om elke persoon agter die skerm te sien soos Jesus hulle sien.

👥 Mense
Vra die Heilige Gees om jou te lei om Jesus se hande en voete te wees deur hoe jy vandag jou vriende hanteer.

🔥 Dink Dieper

Hierdie maand se Skrifgedeelte is = Galasiërs 3

Lees die res van die hoofstuk vandag en let op: 

• Die brief van Galasiërs help ons om te verstaan dat dit die Heilige Gees is wat ons help om te leef soos God wil hê ons moet leef en dat Hy die vrug van die Gees uit ons voortbring. Watter vrug van die Gees kan mense in jou lewe sien en met watter sukkel jy nog?
• Paulus maak dit baie duidelik dat daar net een manier is waarop mense gered kan word en dit is deur te glo dat Jesus Christus ons Enigste Verlosser en Here is. Dink jy die mense het hom geglo? Wat het die ander mense geglo sou hulle red?
• Leef jouself in Paulus se skoene. Hy moes baie vêr loop om die Evangelie van Jesus aan mense te bring. Mense het hom baie keer sleg gesê en weggejaag. Hy was soms ook honger en moeg. Vra die Heilige Gees om jou te help om deur Paulus se oë die boek van Galasiërs te verstaan.